Chocolate Ice cream cake & Jello chocolate parfaits

الحمد لله خف الشوب عنا بالاردن...اطول واسخن موجة حارة بتيجي بحياتي... 

قبل كم يوم حطيت فيديو لزيز عن اكثر الادوات اللي قد تبدو مش مهمة بس فعليا مهمة بالمطبخ اذا بتحبوا تشوفوه

اما بوست اليوم فهو لزيز وشهي اكتر من ما تتخيلو خاصة واني استغليت فيه كيك مكس جبته بالعروض ب 49 قرش وعملت في نوعين حلو 

الحلو الاول هو كعكة الايس كريم بالشوكولاتة واللي عملتها بالشوكولاتة بس بامكانكم تنوعوا فيها كتير وخليني اقولكم كيف

الكرست 

انا خبزت الكيك حسب تعليمات الباكيت وقصيت الجزء العلوي بالسكين المسننة واحتفظت فيه للحلو التاني بس ممكن الكرست تكون 

- بسكوت اوريو مطحون ومعجون مع زبدة

- بسكوت دايجستف مطحون معجون مع زبدة

- ممكن اللي عندهم حساسية ما يحطوا كرست اصلا

البوظة

انا عملتها بالشوكولاتة الغامقة والتنويع اللي ممكن تعملوه هو

- نقطة لون اخضر ونكهة النعنع وما تضيفوا الشوكولاتة بتصير افتر ايت

- مربى فراولة او فراولة مهروسة بتصير نكهة الفراولة او البيريز اذا عندكم

- تتركوها بيضاء وتحطوا صوص كراميل

- تحطوا نكهة قهوة

يعني الاحتمالات لا نهائية

هي الفيديو

كعكة البوظة بالشوكولاتة

المقادير:

كيكة شوكولاتة مكس جاهز مخبوز حسب تعليمات الباكيت بقالب متحرك القعر لتسهيل العمل لاحقا وممكن تستخدموا كيكة شوكولاتة انتو تعملوها (وصفة المدونة بالرابط التالي)

للبوظة:

باكيت جبنة كريمية 227 غم بحرارة الغرفة

1/2 علبة حليب مركز محلى

1/2 1 كوب كريما خفق سائلة

1/2 كوب شوكولاتة مذابة

صوص شوكولاتة جاهز

للتزيين:

فراولة، بسكوت، صوص شوكولاتة

الطريقة:

تخفق مكونات البوظة

تشرب الكعكة بصوص الشوكولاتة

نصب الخليط المخفوق ونسوي السطح وتوضع بالفريزر 6-8 ساعات

نخرجها من القالب وتزين حسب الرغبة (شاهدي الفيديو)

حلو كاسات جلو وكيك الشوكولاتة

استخدمت بواقي الكيك ووزعتها على كاسات التقديم

وشربتها بشوية جلو فراولة محضر حسب تعليمات الباكيت وبردت الباقي بالثلاجة ليصير قوامها مثل المايونيز

خفقت كريما وضفتها على الكيك مع قطع الفراولة

حطيت الجلو ورجعتها تجمد بالثلاجة

زينتها بالكريما والفراولة