Znood Al Sitt & Steak Salad

خلص رمضان وكل سنة وانتو سالمين ويمكن مرق علينا اغرب عيد بالحياة الصراحة لو كان العيد الكبير بجوز ما حسينا فيه ابدا بس لانه كنا صايمين وافطرنا يمكن هاد اكبر احساس بالعيد للاسف السنة وبسبب الحجر لا شوفنا الاهل ولا الحباب ولا حتى العيديات هههههه

تعيدتوا؟

ما رح اطول عليكم ببوست اليوم لانه الفيديو لتوثيق ادائي للسبوع الثالث صار جاهز وما صرفت اشي هاد الاسبوع...كل اللي عملتو من اشياء موجودة عندي...نشوف سوا

وصفات هاد البوست من الاسبوع الثالث همة وصفتين...واحدة منهم صيفية بامتياز وهي وصفة سلطة الستيك

ما رح اكتبها كوصفة لانها اسهل من السهولة

عندي قطعتين ستيك نقعتهم بشوية اتش بي صوص او ممكن ورستشير صوص وكاتشب وشوية خل

حمرتهم بمقلاة غير لاصقة (ممكن على الجريل) وبس بردوا قطعتهم بالطول

للسلطة حطيت خس وممكن جرجير وخيار وبندورة وجبنة شدر وبصل اخضر والستيك وقدمتهم مع صلصة رانش جاهزة

اما وصفة زنود الست فهي وصفة لحلو بيشهي ورمضاني بامتياز وبيعتمد على استخدام عجينة البقلاوة او السبرينج رولز وحشيها بالقشطة البيتية ولفها وقليها بزيد غزير وتنزيلها بالقطر البارد

زنود الست

مقادير القشطة:

2 كوب حليب

كوب كريما (واذا ما في حليب بيمشي الحال)

¼ كوب طحين

3 ملاعق طعام نشا ممتلئة

3 ملاعق طعام سكر

ملعقة طعام ماء زهر

الطريقة:

تخلط كل المواد عدا ماء الزهر وتحرك لتسمك وتغلي ويضاف ماء الزهر وتترك لتبرد مغطاة لمنع تكون القشرة (يمكن تحضيرها قبل يوم)

لزنود الست

عجينة بقلاوة مقصوصة مربعات او عجينة سبريغ رولز تحشى بالقشطة وتلف رول وتقلى بزيت غزير وتصفى وتسقط بالقطر البارد

تزين بالفستق الحلبي ومربى زهر الليمون