One dough & 3 fillings

واول بوست من سنه ونص او اكتر شوي بعد ما رجعت المدونة عامة وللكل والحقيقة اني عمري ما ندمت اني خليتها خاصة لفترة وكان في اسباب كتير بهداك الوقت خلتني اخد هاد القرار زي ما في اسباب برضه خلتني ارجعها عامة وزي ما بيقول المثل لكل وقت اذان ولكل مقام مقال وكمان بيقول لكل دولة زمان ورجال....

طبعا احنا برمضان فرمضان كريم علينا وعليكم وبتمنى تكون اموركم كويسة مع الحجر الصحي وبحب اني انتهز الفرصة واعبر عن فخري اني بنت الارجن واني تحت هالقيادة والجيش واني من ضمن شعب وبالرغم من كل الظروف اثلت انه جد شعب قوي وصبور وواعي كمان.

اليوم 29 نيسان 2020 هو يوم عودة السيارات بشكل جزئي للشوارع  واليوم يوم السيارات اللي رقمها فردي وتضحكوش اذا بقولكم احنا عمارة عيلة وطبعا في اكتر من سيارة وكلهم زوجي الا واحدة ههههههه فهلا رح نتقطع يوم الفردي ههههههه

ما علينا المهم اني ساكنة بمنطقة تعتبر حيوية والها شهر ونص بحالة هدوء كان جدا غريب اولها وجميل بعدين تحول نوعا ما الشعور الى محزن لانه خلاف ما تعودنا وبهدين صار الشعور عادي وهلا الشارع مليان سيارات مارقة وانا عم بكتب هالمقال ورجع الشعور الغريب بس بذكر حالي اديش مهم انا نستمتع باللحظة لانه الهدوء كان جميل والضجة ورجعة الحياة كمان جميلة...

وصفات اليوم بتلاقوها بفيديو على اليوتيب

 وهي 2 خلايا نحل اصلهم عجينة واحدة وهي عجينتي اللي بعتمدها دايما بالمعجنات سهلة وخفيفة وسريعة والها على المدونة من اول ما بدت وهي عجينة العشر دقايق...في عجائن كتيرة بس للعشر دقايق بس بحب هاي لانه موادها تقريبا متوفرة بكل بيت

ومن هالعجينة عملت خلية نحل بشكل هلال وحشيتها لحمة مفرومة مقلبة وبنكهة الشاورما وانتو بتاكلوها مغمسة بصوص الطحينة كانكم بتاكلوا شاورما بالزبط بتشهي

وصفات الفيديو

وصفة العجينة بالرابط

وصفة حشوة الشاورما بالرابط

المقادير:

300 غم لحمة مفرومة مقلبة مع ملح ويضاف الها 

1/2 ملعقة طعام بهارات شاورما (وصفة البهارات بالرابط التالي)

بعد ما تبرد بنضيف بصلة صغيرة نية مفرومة ناعم و1/4 كوب بقدونس مفروم ناعم 

تحشى الخلية وتشكل بالطريقة اللي بتحبوها انا عملتها بشكل هلال رمضان زي الفيديو

تدهن بالكريما (كريما الطبخ وترش بالسماق)

تترك لتخمر 1/4 ساعة بعد التشكيل يحمى خلالها الفرن على اعلى درجة حرارة وتخبز من 12-15 دقيقة المهم تحمر من تحت وتحمر من الوجة

تقدم مع صوص الطحينة وهي عبارة عن

3/4 كوب طحينة

1/4 كوب لبن

عصير ليمون (على حسب ما بتحبوا الحموضة)

ملح

ماء بارد للوصول للفوام الكريمي المطلوب (مش شائل كتير ولا جامد)

شرحتين بصل لاضفاء نكهة البصل على الصوص (اختياري)

يمكن تحضيرها مسبقا

خلية بالزعتر والجبنة لزيزة للفطور والسحور

حشيتها جبنة بيضاء نابلسية (ممكن اي نوع بتحبوا زي الفيتا او الحلوم او الكريمية)

غطشت الكرات ببزيت الزيتون بعدين مرة بالزعتر ومرة بالدقة وممكن تتغطس بالسمس او حبة البركة او الباريكا لاعطاء الوان

بعدين تركتها تخمر 10 دقائق قبل الخبز وحميت الفرن وخبزتها مثل الخلية السابقة (انا عملت واحد صغيرة بنص كمية العجين)

وبعدين حطيت عليها جبنة دهن كاسات (اختياري) بشكل خطوط شوفوا الفيديو

خلية نحل بالقرفة (مونكي بريد) وكانت تحلاية بتشهي

عملتها مرة بشكل عنقود عنب

حشيتها جبنة كريمية (المراعي او كيري او فيلادلفيا)

غطستها بزبدة مذابة بعدين بخليط من كوب سكر مع ملعقة صغيرة قرفة

شكلتهم بقالب الخبز المبطن بورق الخبز ليسهل علي رفعه بعدين

خليته يخمر 15 ساعة 

خبزته بالفرن

حطيت عليه حليب مركز محلى