Pumpkin Chocolate Chip Cookies and a hair mask

شهر جديد بآخره بتبدأ نهاية احلى فصول السنة (الصيف طبعا) وببدأ فصل ما بعرف ليش بحسه محزن مع انه في كتير ناس بيحبوه...تنهييييدة عميقة.... بس بوعدكم اني رح احاول اصير احبه...

الفترة الماضية والحالية حاسة حالي بدور بحلقة مفرغة...الحمد لله بنجز وكله تمام بس حاسة حالي زي اللي بيرحل... طبعا السبب هو اني عم بفضي اغراضي تماما من الروف لانه بدهم يشتغلوا فيه ليبزبطوه ....(هو لبنت حماي عايشة باميركا) والصراحة كنت حاطة كتير شغلات من اغراض البزنس من علب وغيره فيه وهلا عم بفضي والعملية مش بس مرهقة جسديا ...كمان لازم اخترع محلات لكل شي عم بنزله لانه ما عندي وسع بالبيت...بس عم بحاول اطلع على الجانب الايجابي...

اولا عم بفضي وبفلتر الاشياء وبوزع الاشياء القديمة

ثانيا...بتصدقوش اديش في شغلات نسيت انها عندي اصلا :) وانبسطت فيهم كتير...

ثالثا...هلا عملت حصر لشو عندي مشان ما اشتري اشي جديد لانه مثلا في منه كتير بس كنت مرات ما انتبه واجيب كمان ويكوم

رابعا... بظن احسن شي يكون كل اشي ببيتي...اريح الي بدل الطلعة والنزلة 

خامسا... اخيرا رح امشي بكم مشروع كرافتس مهمين الي حاطتهم على الرف الف سنه وهلا لازم اشتغل فيهم بحكم اني رح انزلهم على البيت منهم خزانتين وطاولة بدهم دهان وشغل...بدي اروق عليهم وهدول رح ياخدوا اشياء كتير جواتهم (فصدي الخزانتين) وهاد بحد ذاته رح يحل شوي ازمة...

سادسا... ياسمين وسلطان مسافرين وبالتالي جزء كبير من خزاينهم فضيت ورح استغلها للتخزين مؤقتا...

فزي ما انتو شايفين اذا الواحد نوى انه يشوف الجانب الايجابي من وضع معين كان متعود عليه وتغير لسبب ما ...فعليا مهما تضايق اكيد في خير ما ممكن يقجر يشو فه وزي ما انتو شايفين لقيت 6 اشياء ايجابية مش اشي واحد...

المهم اني خلال هاي العملية رح احتاج اني اركب كم رف واعيد النظر باماكن الاشياء اللي موجودة اصلا وهاد رح ياخد وقت وجهد كبير الصراحة لانكم قادرين تتخيلوا اديش عندي اغراض؟!!!! ....للبيت ...للتصوير...للبزنس...للكرافتس....تنهيدة عمييييقة كمان مرة...مش عارفة اذا في ايموجيز هون ولا لا هههههه احسن تعبير عن الشعور هي البنت اللي ضاربة على وجهها :)

وعلى صعيد اخر وبالنسبة للمطبخ رح يكون في فيديو جديد قريب...اورجيكم فيه اخر الترتيبات...والديكورات النهائية...مع شوبة احباطات بديش احكي عنها هلا..خليها للفيديو... بجوز احطه البوست الجاي..

هاد الشهر قررت اني احاول ادير بالي على حالي شوي... فقررت اني اخصص ساعة بالاسبوع اعمل فيها 3 شغلات:
1. ماسك لشعري
2. ماسك لوجهي
3. بديكير ومنيكير اذا زبط (فعليا حف الرجلين هههههه بس لا اكثر وترطيبهم)

لحد الان المشروع زابط وسهل بالاضافة الى روتين صباحي ومسائي للوجة سريع ويومي او لما اتذكر ههههههه بس مهم لما احط مكياج


من الماسكات اللي عماتها ماسك الجرجير وزيت جوز الهند ماسك سهل ومفيد اكيد لتكثيف الشعر بس وسخ الدنيا..
الطريقة الاصلية بتقول بتخلطوا المكونات وبتحطوها على شعركم بس يا عيني لما بدك تحطيه او تغسلي شعرك من بقايا الجرجير....مأساه... عشان هيك قررت اني اعمله واصفيه منيح وبعدين احطه على شعري كخلاصة بدون بواقي الجرجير ...
اللي بالكيس فرزته لاستعمال اسبوع تاني
طبعا حطيته ساعة على شعري مع فرك الفروة وحطيت طاقية حمام وكنت اهرهر جرجير ههههههههه جد لازم يتصفى....

من اهم ال tips اللي حكتلي اياهم اللي بتعملي شعري انه اي ماسك فيه زيت بينحط على جذور الشعر يس ومش على الاطراف واللي اساسه كريم بينحط على الشعر بدون الوصول للجذور...

وعملت ماسك جاهز قناع بالبلوبري من جولي شيك لوجهي وسنفرت الرجلين (هاد الاسبوع الماضي) ان شاء الله استمر :)

وبما انه بدأت تباشير الخريف...
بسكوت ولا اسهل باستخدام الكيك مكس وبدون بيض بس لازم تعرفوا قبل انه قوامه طري اقرب للكيك ...يعني ما بيقرش بس كتير طيب

بسكوت اليقطين وتشيبس الشوكولاتة
المقادير:
باكيت كيك مكس فانيلا
2 كوب تشوكلت تشيبس
علبة مهروس اليقطين وممكن انتو تسلقوه وتصفوه منيح بدنا حوالي 3/4 1 كوب معياري
ملعقة صغيرة قرفة
1/2 ملعقة صغيرة زنجبيل بودرة
1/2 ملعقة صغيرة جوزة الطيب
رشة كبش قرنقل

الطريقة:
تخلط كلها معا
نحمي الفرن على 180 ويوضع كمية منها بالملعقة على صينية مبطنة بورق الخبز ونضغط عليها براحة اليد لتفرد قليلا
تخبز حوالي 15 دقيقة
تترك لترتاح قليلا على الصينية وتنقل لسلك معدني