Coconut & Mango Tapioca Pudding

الفترة الماضية كانت فترة صعبة بكل معنى الكلمة...

اولا سلطان سافر... والغريب انه كان عاطفي اكتر من ياسمين وهاد صعب الامور علي اكثر... مو عارفة اكيد الناس شخصيات بس الدنيا صايرة بالعكس...البنت اصلب واقوى من الشب ولا هي بتشعر انها لازم تبين قوية ولا شو بالزبط... المهم انا عارفة بس لانها اول مرة وبعدين بتمشي الامور...واللي بيسمع بيفكر انه سلطان طول نهاره قاعد معنا والحقيقة انه يدوب نشوفه فانا مستغربة من الوداع العاطفي اللي صار .... بس اموره الحمد لله تمام والحمد لله هو مع ابن عمه اللي مثل اخوه تمام...

ثانيا شغل شغل وضب وتعزيل ولسة ما خلصت بعد ما جبت اغلب اغراضي من الرووف والنتيجة

ثالثا...اللي فيكم بيعرفوا المشكلة اللي صارت مع ظهري بشهر 11...مع الشغل رجعت مرة تانية ... رحت على الدكتور وهيني هلأ على المسكنات .... ولازم ما احمل ولا اشي تقيل ابدا...كيف ما بعرف....رح احاول 

فزي ما انتو شايفين وبالرغم من اني بحاول اطلع على الجانب المليان الوضع كان ضغط شوي ...هاد بدون ذكر الاشياء اليومية والبزنس.. الله يعين

فالبوست هاد مو متأخر وبس...شبه عفن ههههه الي بكتب فيه ايام وبتذكر زمان كيف كنت اكتب البوست واخلص وابدا بالتاني بنفس اليوم بس طبعا مسؤولياتي كانت اقل بوجود البنت اللي بتساعدني بالاضافة الى اني ما كنت اعمل فيديوهات... عم بحس كل مالها العمليات بتتعقد :)

المهم خليني اشارككم اخر اخبار شراء الحاجيات والتحضيرات لبعض وجبات شهر 9 (اللي قرب يخلص) 

وطبعا جائزة شهر 9 واللي رح اعلن الفائزة منكم فيها بالبوست الجاي وقبل على الانستغرام

وبالحديث عن الانشغال الي من شهر 3 وانا عم بحاول انظم غرفة المونة وتأخرت كتير لاسباب كتيرة منها مادية لانه كنت بدي اجيب شغلات معينة بس فعليا انا ما كنت مركزة منيح... التفاصيل بالفيديو اللي رح تشوفوا فيه حلول تنظيمية مختلفة استخدمتها

وصفة اليوم وصفة حلو خفيف ولزيز ومش اشي معتاد بس بما انه المانجا معبية السوق فقلت ليه لا...

بتعرفوا حبوب التابيوكا او كا يسمى بالساكو او الساقو...

هي صورتها ومتوفرة بقسم الاكل الاسيوي باغلب السوبرماركتات وبلونين ابيض واخضرعنا بس فيه منها الوان واللي بيعرفوا منكم محل جوس بانج بانج (هاد اللي جوا العصير)

وهي نوع من انواع المخثرات او المسمكات مثل النشا والطحين وتعتير جلوتين فري...تستخرج من جذر نبات اسمه كاسافا 

عملت فيها بوديج بجوز الهند والمانجا بيشهي وهي الطريقة

بودينج التابيوكا بجوز الهند والمانجا

المقادير:

6 اكواب ماء

1/2 كوب حبوب التابيوكا

3/4 1  كوب حليب جوز هند (علبة)

1/2 كوب حليب

1/4 كوب سكر

مانجا حبة كبيرة مقطعة

الطريقة:

يغلى الماء في قدر على النار

تضاف حبوب التابيوكا وتطبخ مدة نصف ساعة على حرارة وسط الى منخفضة

ترفع وتترك لتبرد 5 دقائق

توضع بمصفاة وتفسل بالماء البارد وتصفى جيدا

في قدر اخر تخلط بقية المقادير ما عدا المانجا وتغلى

ترفع عن النار وتترك لتبرد

تخلط مكونات الحليب البردة مع التابيوكا والمانجا وتصب بكاسات وتبرد

تزين بالكزيد من المانجا

(يمكن اضافة نكهة المانجا او جوز الهند للحليب)