My before eid gathering (vlog)

عيد اضحى مبارك على الجميع بتمنى انكم مستمتعين بالعيد...

انا عم بكتب اول يوم الساعة 9 صباحا لحتى اشارككم فيديو عزومة الوقفة زي ما وعدتكم بتفاصيله

الاشي الاول اللي بحب اقوله انه الفائزة منكم بهدية شهر 8 هي نانسي ...الف مبروك وياذن الله في جائزة بتشبهها كل شهر من هون لنهاية السنة باذن الله.

الاشي الثاني اني بهاي العزومة من اكتر الاشياء اللي سهلت حياني هو الطبخ اول الشهر...

يعني ما رحت اشتريت اي شي خاص واستخدمت الاشياء اللي عندي بسبب اولا:

التوفير سواء فلوس او وقت وتانيا

اني عارفة انه بالعيد رح نطلع وبالتالي ما رح احتاج اطبخ فهاي بتعادل هاي ...

بس قبل المنيو نشوف سوا شو تحضيراتي وتخطيطاتي كانت للعيد

منيو العزومة كان:

- شوربة بندورة 

- لبنة بالفستق الحلبي والرمان (لبنة بيتية من لبن بيتي)

- حمص باللحمة والصنوبر (حمص بيتي وشفتوني كيف فرزت لحمة لهاد الموضوع)

- خروف العيد ....كان السنتر بيس ورح تشوفوا بالفيديو كيف عملته واستخدمت عجينتي المعتمدة (عجينة العشر دقايق بس ضفت شوية حليب بودرة الها) كان محشي محمرة من دبس الفليفلة شغلي وزعتر وجبنة بيضاء

- كابريس اعواد (جبنة موزريلا وريحان وبندورة مغزوزين بخل بلسامك)

- صيني مع ارز (الصيني من تفريز الشهر)

- ستيك بالفطر (من تفريز الشهر)

- ستريبس دجاج بالباربكيو صوص مع بطاطا مقلية وباربكيو صوص وهوني ماسترد وكاتشب (قليت الدجاج من اميريكانا وحطيت عليهم صوص باربكيو وقلبتهم

- اسباجيتي بالفرن (من تفريز الشهر)

- كولسلو

- سلطة بطيخ وجبنة

- زيتون نوعين وخبز

- لبن عيران بيتي

- ايس تي بالليمون والنعنع ببواقي شاي من عندي مع خليط ليبتون الجاهز من المونة 

- فواكة (عنب ، فراولة، صبر، كيوي)

- كعكة فانيلا بالكاسترد والفواكة

- بوظة بالفستق الحلبي الوصفة تحت بهاد البوست

- شاي وقهوة

للاسف ما قدرت اصور كل شي ... بس كنت اجلي اول باول واضب اول باول وشطفت المطبخ بس خلصت الطبخ كله الظهر وكنت محضرة السفرة من قبل بيوم

حبيت ترتيب السفرة يتماشى مع غرفة القعدة وديكور ورق الشجر فاستخدمت الاشياء الموجودة عندي....

مشكلة 1: عدد المدعوين 10 وصحوني البيض بس 9 لانهم انكسر منهم فقررت احط 5 بيض و 5 سود وطلع حلو وكأنه ديكور ومقصود

السنتر بيس....زي ما انتو شايفين مرتبانات مختلفة وازايز قديمة وورق شجر

اللي بقدر اقولكم اياه زي ما جكيت مسبقا وجود وجبات الفريزر انقذني من التكاليف وكمان بالوقت خاصة اني حضرت قبل بيوم بعض بسكوتات وحلويات للعيد رح تشوفوها بفيديو يلي بوست اليوم

كمان بقدر اقولكم فكروا برة الصندوق واستفيدوا من اللي عندكم لتقدموا عزومة حلوة لانه العزومة مو بس اكل وانما ذكريات حلوة بتنحفر بالذاكرة فاعطي ضيوفك هاد الشعور

نشوف سوا شو عملت وكل سنة وانتو سالمين

بوظة الفستق الحلبي

المقادير والطريقة:

2 كوب كريما خفق تخفق لتسمك

علبة حليب مركز محلى تضاف

باكيت فانيلا 

فستق حلبي مجروش حوالي كوب

زبدة فستق حلبي حطيتهل بين طبقات البوظة 

حطيتها بقالب مبطن وبالفريزر بعيد قلبتها وزينتها بزبدة الفستق