Tahini Kufta and chocolate chips scones from homemade mix

بدأت بوادر الخريف وهو الفصل المفضل لكتير ناس...انا مش منهم...محزن هاد الفصل....بالمقابل عم بحاول اعمل رفع لمعنوياتي باني اغير شوي باكسسوارات غرفة القعدة واخليها بطابع برتقالي دافئ ...وشاركتكم بعض الصور على سناب تشات...

اليوم رح يكون البوست الاخير بسلسة التأقلم بعدم وجود مساعدة منزلية وبهاد البوست بدي اركز على ال tips اللي بعملها واللي المفروض تساعدكم بشغل البيت بالاضافة الى التنظيم

رح اخد هاد الموضوع بشكل مفصل بحيث نقسم المهمات مهمة مهمة ورح اقسمه لقسمين...اليوم القسم الاول

المطبخ:

الجلي:

طبعا هاد معضلة المعضلات والتي لا تنتهي خاصة لواحدة مثلي شغلها كله بده جلي وجلي مستمر...الجلاية لن تحل مشكلة عندي ابدا لانه حجم الجلي جدا كبير بالاضافة الى انه ما عندي وسع الها...ففعليا اللي منكم بتقدر هاد حل ممتاز الها...بحالتي لقيت انه الامور التالية ساعدت جدا:

- الجلي اول باول (مش دايما بزبط بس الى حد ما)

- المي السخنة...معجزة مع ازالة الاشياء الملزقة بالصحون والطناجر

- تنظيف الصواني والقلايات والطناجر اول باول بمزيل الدهون (يعني كل ما اجاي طنجرة بتأكد انه ما في اي بقع صفراء من الدهون عليها واذا فيه فورا برشها ببخاخ ازالة الدهون وبنظفها) هيك بتضل تلمع وما بتتراكم الدهون وبتاخد وقت

- استخدام المواد المساعدة من ليف نوعية جيدة وسلكة معدنية وبخاخ ازالة دهون جيد

الغاز والفرن

مسح يومي ومرة بالاسبوع تنظيف عميق للغاز والفرن مرة كل اسبوعين الا اذا احتاج الامر اكتر...استخدموا مواد تساعدكم وعادة برشه وبتركه اعمل اشي تاني وبرجعله بيكون انتقع والتظيف اسهل

الارض:

بالنسبة الي يوميا وممكن يوم بعد يوم للي ما بيتوسخ مطبخهم كتير... بستخدم مكنسة خشنة لفرك الارض لانه بلاط المطبخ عندي للاسف بيتطلب ذلك وبعدين شطف وهيك بيضل البلاط يلمع

خزاين المطبخ

بعمل معهم مهمة ال 10 دقايق وسبق حكينا فيها ببوستات سابقة

الملابس

الكوي

كتير منكم سالني عن الغسيل والكوي هلا انا كتير بحي الغسيل ونشره فما عندي مشكلة بالموضوع وبشتغل فيه اول باول بيضل الكوي وبالبداية كنت اكوي اول باول بس قررت اعمل التالي:
- كتير من الاشياء اللي كانت تنكوي فعليا لقيت انه ما في داعي
- لما بنشر الغسيل بنفض منيح ولما المه ما بكومه فوق بعض لحتى تقل الجعلكة
- الاستعانة بمساعدة احيانا بارسال الملابس الصعبة للكوي برة
- استخدام مكواة البخار القائمة رهيبة للفساتين والاشياء الخفيفة اللي ممكن تنحرق

الغسيل
اكتشفت بعد ما راحت البنت اللي بتساعدني انه كان في هدر باستخدام دواء الغسيل بشكل خرافي...انا بحب اغسل وانشر فبهادا المجال ما عملت اي تعديلات او اشياء للاختصار اللهم اني ركبت مناشر جديدة

وهلا نيجي لوصفاتنا اليوم وصفتين روعة واحدة حلو وواحدة مالح...
الكفتة بالطحينة من اكتر الوصفات اللي بنحبها بس المشكلة انه الطحينة بس تنحط بالفرن بتفرط...وصفتي اليوم مش بس الصوص ما بتفرط واضافات رهيبة للطعم...

الكفتة بالطحينة والبصل المكرمل
المقادير:
1/2 كيلو لحم مفروم ناعم (يفضل خروف وعجل)
1/2 ضمة بقدونس مفروم
1/2  ضمة كزبرة خضراء مفرومة
بصلة مفرومة ناعم جدا
2 سن ثوم مهروس
ملح، فلفل اسود
ملعقة صغيرة بهار وقرفة (ممكن بهارات كفتة او بهارات مشكلة)
1/2 ملعقة صغيرة كاري (اختياري)
للصوص:
2 كوب ماء

كوب طحينة
3/4 كوب لبن زبادي
1/2 1 ملعقة كبيرة نشا
عصير ليمونة كبيرة
ملح، فلفل اسود
1/2 كوب كريما طبخ
ملعقة صغيرة ماجي طبيعي
2 سن ثوم مهروس
ملعقة طعام زيت

2 ملعقة طعام زيت زيتون
بصلة كبيرة مقطعة جوانح رفيعة

للوجة :
بقدونس مفروم وكزبرة
رشة سماق
المزيد من البصل المقلي (اختياري)

الطريقة:
لعمل البصل المكرمل: نضع الزيت بمقلاة على النار ونضبف البصل ونرشه بالقليل من الملح ويطبخ على حرارة منخفضة ليصبح بلون بني مكرمل نتيجة الطبخ البطيء (من 20-25 دقيقة) وتبرز حلاوته
تخلط مكونات الكفتة وتكور وتوضع في صينية بالفرن على 180 لتتحمر من كل الجهات
تخفق مكونات الصوص بالخلاط
تسكب فوق الكفتة ويضاف البصل المكرمل وممكن ترك القليل للوجة
تعاد للفرن وتترك لتتسبك قليلا من 15-20 دقيقة
اذا اردت اضافة البطاطا المقلية فيمكن اضافتها اخر 5 دقائق
ترش بالبقدونس والسماق والكزبرة
تقدم مع الارز

اما وصفة الحلو فهي للسكونز باستخدام الخليط المتعدد الاستخدامات...

سكونز تشوكلت تشيبس
المقادير:
2 كوب الخليط المتعدد الاستخدامات
1/2 كوب تشوكلت تشيبس
1/3 كوب كريما
3 ملاعق طعام سكر
بيضة
ملعقة صغيرة فانيلا
للوجة
المزيد من الكريما للدهن وسكر لرش الوجة

الطريقة:
نحمي الفرن ل 200
تخلط المكونات الجافة وتضاف السائلة لها وتخلط لتتلملم فقط بدون عجن
نقوم بعملها على شكل دائرةبقطر 20 سم
تقطعها مثلثات
تدهن بالكريما ويرش الوجة بالسكر
تخبز 12 دقيقة تقريبا او اكثر لتتحمر