شوربة الزهرة بالجبنة

واخيرا رجعت للمدونة....الي اكتر من 10 ايام مش كاتبة اشي واكيد حاسة انه في اشي ناقص..بعد العودة من السفر..كنت بدبي مع العيلة وانبسطنا كتييير والحمد لله...رحلة جميلة مليانة بالمشي واللفلفة والاكل اكيد...مش معقول شو في تنوع بالمطاعم والقهاوي وما بيلحق الواحد يقدر يجرب او يدوق كل اشي وطريقة التقديم فظيعة....من اكتر الاطباق اللي حبيتها بالفعل كانت البيكان باي عند بتيل بدبي مول...اولا بحب اشكر صديقتي سماح القعقاع لانها قالتلي لازم تجربيها..وثانيا بحب اشكر صديقتي نسرين الشوا لانها اخدت من وقتها وشافتني وعزمتني على بتيل مع سلمونتي....سليمان ابنها الصغير....كانت قعدة حلوة وانبسطنا كتييير....وتغزلنا بالبيكان باي بالتمر...ما الها حل قد مو طيبة...

وبالقرية العالمية اكلت كنافة بالجناح التركي...ياااا سلام...مع اني مش من عشاق الكنافة...بس كانت زاكية جدا...نوع الجبنة اكيد اله دور كبير بالموضوع...وهاد اعتقد انه سر اديش الاكل زاكي هناك...الجودة بالمكونات اللي بتنحط هي اهم الاسرار...يعني اكلنا بمطعمين بناكل فيهم بعمان بس لسبب ما الطعم اغنى بدبي...بجوز لانه الواحد بالسفر بيستمتع اكتر بس الحقيقة انه في تميز خاص لكل مطعم وقهوة..واعتقد انه المنافسة هي اساس سعي كل مطعم انه يقدم الافضل بالنوعية والطعم والشكل والتفرد بتقديم اطباق معينة....ازكى برغروبطاطا مقلية كان عند Shake Shack ...ما بيقدم غير البرغر بانواع محددة وبطاطا مقلية اما سادة او بصوص الجبنة وميلك شيك بانواعه... مكان واضح المعالم والطابور ما شاء الله...والبرغر كتيير زاكي لانه بيستعمل بيف Angus وهو من 

اجود انواع البيف...

للاسف من عجقتي خاصة مع هارون ما صحللي اصور كل اشي ولا باي طريقة احترافية او عشوائية...بس خلاصة القول اني زايدة كم كيلو بالرغم من المشي المتواصل....بس ولا بيهمني بنزلهم هون بالركوضة ورا كل اشي بالحياة اليومية..

من امتع المشاهد اللي كانت بالرحلة هي ركن الاكل الشعبي لسيدات من الامارات في القرية العالمية بيعملوا لقيمات وحلويات من التراث الاماراتي... صورتها ومش عارفة كيف عملت لغي للصورة :(

فراجعة وكلي حماس لتجربة وصفات جديدة بالمطبخ ومحاولة تقليد بعض الاطباق اللي عجبتني كتير ومنها ريزوتو بالنقانق والزعفران وسلطة بالكينوا والشمندر والفتة وحلو بالريكوتا والليمون والرازبري واكيد بدي اجرب اعمل بيكان باي جديدة لاشوف اذا بقدر اقرب على وصفة بتيل.....

امبارح على الفيسبوك اعلنت الفائزة بمسابقة شهر 1 واللي كان شرطها تجربة وصفات من المدونة ومشاركتنا بالصور والتعليق تحت كل وصفة والفائزة بدون منازع كانت السيدة حنان ابو غوش واللي جربت 80 وصفة...80!!! جد حنان شكرا على الثقة...وكمان بشكر كل السيدات اللي جربوا وبعتولي...وبتمنالكم حظ احسن المرات الجاي...يعطيكم الف عافية وشكرا على ثقتكم اللي بعتز فيها...وبتمنى اكون عند حسن ظنكم دايما..

وبما انه بدا شهر 2 واتفقنا على خطة تعزيل مبدئية قبل الصيف فهي خطتي ابتداءا من بكرة ان شاء الله لاني لسة مضعضعة وبدي اجازة من الاجازة...ههههههه

الاسبوع الاول: غرفتي (ساعة ونص كل يوم انا والبنت اللي عندي...كل واحدة بتستلم اشي)

الثلاثاء 2/3 :  مهمتي تعزيل خزانتي (تنظيف ومسح وترتيب كامل) + غسل كل البشاكير الصغيرة (بشاكير الوجة ) مع كربونات وشوية خل لانعاشهم وازالة اي روائح غير مرغوب فيها...رح احكي عن هاد الموضوع ببوست بكرة ان شاء الله 

مهمة مساعدتي:  تنظيف الشباك...زي الزفت وبعرف انه شتاء لسة بس مشان ما يتراكم

الاربعاء 2/4: مهمتي: تعزيل الكومودينات والتسريحة (تنظيف ومسح وترتيب كامل)+ غسل الفراش وتهويته

 مهمة مساعدتي: فرك الارض بصابون نابلسي مبشور

الخميس 2/5: تعزيل خزانة جوزو :)  (تنظيف ومسح وترتيب كامل) 

 مهمة مساعدتي : تلييف حيطان الحمام مزبوط و شباك الحمام وفرك الارض

الجمعة 2/6: تعزيل خزانة الحمام  (تنظيف ومسح وترتيب كامل)+ غسيل ستارة الحمام

السبت 2/7: اجازة :) واستعداد لغرفة جديدة

وطبعا خلال التعزيل لازم اتخلص من اشياء ما بدي اياها من باب التخفيف زي ما حكينا قبل

اما المنيو للاسبوع فهي رح تعتمد كتير على شو في عندي بالفريزر...

الاثنين: الغداء عند اهلي

الثلاثاء: ورق لسان (بتعرفوه؟ ) + سلطة

الاربعاء: بواقي

الخميس: ستيك (موجود عندي بالفريزر)

الجمعة: نوع معكرونة (لسة ما قررت بس باللحمة المفرومة باستخدام ما عندي بالمونة والفريزر)

السبت: اجنحة دجاج ونوع ارز جانبي

اما وصفة اليوم فهي لشوربة سهلة ومشبعة جدا وهي شوربة الزهرة بالجبنة

شوربة الزهرة بالجبنة

المقادير:

راس زهرة وسط مقطع

2 اصبع كرفس مفروم

بصلة مفرومة

2 حبة جزر مفروم

3 كوب مرق دجاج

3 ملاعق طعام زبدة

3 ملاعق طعام طحين

2 كوب حليب

كوب جبنة شدر حادة

ملح، فلفل اسود

للوجة: رشة صوص توباسكو حار (اختياري)

الطريقة:

نضع البصل والزهرة والكرفس والجزر ومرق الدجاج على النار ونخفض الحرارة عندما يغلي ونغطيه 3/4 تغطية لتطرى الخضار وتنضج

نأخذ جزء منها ونطحنة بالخلاط ونرجعه للقدر

في قدر اخر نذيب الزبدة ونحمص الطحين قليلا ثم نضيف الحليب ونحرك لتسمك ونضيفها للخضار

نماح ونبهر ونضيف الشدر لتذوب

تقدم ساخنة مع الخبز الطازج ..ورشة صوص حارة لمن يرغب

الف صحة