اجنحة الدجاج بالكاتشب وخطة الاكل لشهر شباط

بتمنى تكونوا قضيتوا يوم جمعة لطيف مع العائلة...

شهر 2 بدا ورحت على كارفور عشان اجيب اغراض...عروض ممتازة استغلوها...وحاولت  قدر الامكان اني التزم بالتحدي وهو استغلال اللي عندي مشان اوفر مع الحرص على اني ما اخرب المونة واني وقدر المستطاع وضمن الميزانية اخليها بحالة جيدة...
من الاشياء اللي اشتريتها من كارفور ضمن التخزين
10 ك طحين 3.39
10 ك سكر 3.79
2 مرتبان رب بندورة كبير 1.78
زيت 3.5 لتر ب 3.89
6 علب ذرة ب 3.30 (العلبة ب 55 قرش)
5 كيلو ارز 3.59
ولغير الاكل:
5 كيلو مسحوق غسيل ب 7.77
10 باكيتات فاين ب 5.19

طبعا واغراض تانية بس مش كتير...اغلب الشراء الثاني كان لحمة (ابدعت بس للشهر كله ان شاء الله)  وخضار...
ملفوفة كبيرة ب 57 قرش (الكيلو ب 19 قرش)
ليمون...جبت كيسين كبار للعصر والتفريز لانة الكيلو ب  79 قرش فاشتريت ب 4.10
فليفلة حمراء الكيلو ب 1.15...عندي مشوي بالفريزر بس جبت شوي (6) ب 73 قرش
اللحمة...كتف استرالي الكيلو ب 3.79....سعر ممتاز ونوعية ممتازة بس للاسف ما بيقطعها غير بعظمها للمقلوبة والمنسف وهيك فجبت كمية لطبخة منسف ولطبخة مقلوبة ب 8 دنانير (كل طبخة 9 قطع لحمة مناح وكبار)
وواحد تاني خليتو زي ما هو لاكلة روست مع خضار ب 10.59
واحدة فيلية برازيلي ب 27.59 دينار...قطعتها انا بالبيت (طبختين ستيك (11 قطعة كل طبخة...ما شاء الله عندي بالبيت من محبي اللحوم) و طبخة بيف استروغونوف من الزوايد
بس لانه بدي راس عصفور ومفروم ناعم اخدت خروف نيوزلندي (الكيلو ب 5 وشوي) ولانه بقبل يقطعه ويفرمه فطلعوا 4 طبخات مناح راس عصفور (12 شقفة حجم ممتاز بكل طبخة) و المفروم خلطته مع عجل (طبخة كفتة وطبخة عرايس و3 طبخات تانية) وطبخة مفروم خشن للملفوف وطلعوا كلهم 23.20
وجبت كمان 8 ريش مليانين لحمة ب 6.79 لطبخة ورق دوالي (مش قلتلكم ابدعت باللحمة ) :) وكمان جبت دجاجة كاملة ب 3.15
وزي ما انتو شايفين فترتبت عندي منيو ممتازة عشوائيا بتطلع هيك: (اليوم من زوايد دجاج امبارح عملت فطيرة الراعي بالدجاج والكريما والبطاطا وشوربة خضار) اما الاكلات القادمة واللي رح انزل المنيو بكرة ان شاء الله للاسبوعين الجايين
- ملفوف
- بيتزا (منوع دجاج بالباربكيو (من بواقي دجاج بالفريزر) ومارغريتا وبالهوت دوغز (بواقي بالفريزر) وعندي واحد جبنة موزريلا كبير 2.5 كيلو مبشور ومفرز من الشهر الماضي)
- مقلوبة زهرة (راس زهرة بلدية من امي اعطتني اياها ف الزهرة ببلاش) واللحمة كيس من اللي بعظمة
- انشلادا الدجاج بتورتيلا منزلية وكمية من الدجاج من الدجاجة الكاملة اللي اشتريتها واللي ناوية اسلقها وتدخل ب طبختين والمرقة شوربة)
- طبخة تانية بالدجاج المسلوق الباقي (لسة ما قررت شو هيه)
- بازيلا وارز (بازيلا وجزر اشتريت كيسين من كارفور اليوم وراحوا على الفريزر وباكيت لحمة راس عصفور)
- منسف
- عرايس وبطاطا مقلية (بواقي بطاطا من كيس بالفريزر )
- ستيك (طبختين مختلفتين لسة ما قررت تحديدا ايش همه)
- بيف استروغونوف
- كفتة
- سمك تلابيا (عندي بالفريزر ورح ينعمل منه صيادية وطبخة سمك بشارككم بوصفتها ان شاء الله)
- ورق دوالي وتحته ريش
- روست مع خضار
- اسباجتي
- معكرونة بالبشاميل
- مجدرة
- فاصوليا بيضاء (من الفريزر)

ف 18 طبخة لحد الآن والا يكون في يوم بواقي (خلينا نقول 4 ايام) واكيد 4 جمع ان شاء الله راحة (يوم اجازتي من الطبخ) ويومين عند اهلي :) (عزمت حالي من هلأ)  وشهر 2 28 يوم..ممتاااااااز....خلص الشهر وبكون ابدعت وما في اشياء تنشرى الا رتوش صغيرة وخضار بسيطة)
صرفت لغاية الآن بكل اللي حكيته (وفي اشياء ما جبت سيرتها) ... 175 دينار :) و11 دينار حليب لهارون ف 186 دينار....زقفة حامية لحالي :)...بكون شاطرة جدا اذا بصمد لآخر الشهر ب 100 دينار (تشمل حفظات لهارون وحليب والخضار اللي ننكن نحتاجا واشياء زاكية للمدرسة اللي قربت (الحمد لله) ...

طيب اكلة اليوم بعد ما نشقت ريقكم هي جوانح دجاج شو زاكية...شو سهلة...شو بتعمليها ب 5 دقايق....شو مش غالية (صحن الاجنحة بحوالي 2 دينار) وعندي بيموتوا فيها فعملت 2 (عملتها قبل يومين فمش من الشهر هاد :)


اجنحة الدجاج بالكاتشب
المقادير:
2 باكيت اجنحة دجاج (حوالي 20 جناح) منظف
ملح
فلفل اسود
1/2 1 كوب كاتشب
ملعقة طعام سكر بني

1/4 كوب خل
2 ملعقة طعام ورستشير صوص
ملعقة طعام ماسترد ديجون او عادي
2 سن ثوم مدقوق

الطريقة:
ترش الاجنحة بالملح والفلفل الاسود
تخلط كل المقادير السابقة وتضاف فوق الاجنحة
توضع بالفرن على حرارة 180 مدة 50 دقيقة ال ساعة مع التقليب كل 15 دقيقة
ترش بالبصل الاخضر المفروم وتقدم  وصحتين
ملاحظة: هاي الاكلة بدها كلينكس كتير لانها Very Messy بس بستاااااهل...