كيف تحددي الميزانية الشهرية للبيت وتدخلي بناء الخزين: البوست الرابع ووصفة الارز المصري المعمر خالص!!!!

انا حطيت بوست اليوم الصبح بس ما قدرتش اقاوم اجاوب ....
سألتني واحدة من الصاحبات سؤال وجيه وهو كيف بتعرفي شو الميزانية المناسبة للبيت وكيف تحدديها؟ والجواب هو انه كل بيت ميزانيته اكيد بتختلف عن البيت التاني طبعا حسب:
1. عدد افراد الاسرة
2. دخل الاسرة واديش بتقدر تحدد لميزانية البيت
3. اذا بتعملي عزايم او لأ واكم مرة بالشهر
4. بتطبخي ولا مش كتير بتحبي الطبخ
5. شو نوع الاكل اللي بتفضله اسرتك؟ صحي، شرقي، غربي...الخ

وهون مهم ابين انه شغل البيت والاكل بالبيت دايما ابرك وارخص وانظف من اكل بره بس مرات الحاجة والظروف تتطلب انه الواحد يطلب او ياكل برة...

الكلمة الذهبية هون هي: التخطيط...التخطيط...التخطيط....وكمان مرة...النخطيط...(حاولت احطها بلون ذهبي :) وهاد اقرب واحد....التخطيط هو اساس نجاحك بالالتزام بالميزانية...وعشان هاد الحكي يصير مهم انك :
1. تعملي المنيو الاسبوعية (ضروري) لانه بيحددلك شو تشتري وبتتفادي الشراء العشوائي لاشياء مش لازمة.
2. الالتزام...المغريات كتير بالسوبرماركت وانا واحدة من الناس اللي بتوقع بفخ هادا زاكي وهادا بشهي...روحي على السوبرماركت وانتي شبعانة وما تاخدي الاولاد ،ان امكن ، لانهم مش بس بجننوكي وبيصيروا يغنوا موال "بدي هاد وبدي هداك"!!!! وانت كمان...التزمي...ماشي !!! :)
3. سجلي مصروفاتك على دفتر خاص لهاد الاشي مشان تضلك متابعة
4. اتبعي نظام المظاريف....هههههه شوووووووووووووو؟ اوكي...يعني جيبي كم ظرف رسائل فاضي واكتبي على كل واحد لشو هو بعد ما تحددي ميزانيتك نفسها. انا عندي واحد للاكل وواحد لادوات التنظيف وواحد لبناء الخزين واكثر من واحد تاني ميزانيات مش للبيت (شخصي وللاولاد...الخ) هادا النظام قد يبدو معقد بس هو سهل جدا وبخليكي تعرفي اديش ضايل عندك بكل بند. واذا مش حاببتيه ممكن انك تكتفي بالتسجيل بعامود لكل بند عشان تعرفي وين وصلتي...

هلأ عشان تقدري تحددي اديش تحطي ميزانية للبيت بيتطلب منك انك تعصري مخك وتحاولي وبناءا على ذاكرتك (وانا مش من الناس تبعون الذاكرة!!!!) انه اديش معدل صرفك بالشهر على البيت وتحاولي انك تخففيها شوي الشهر الجاي وبعدين تسجلي خلال الشهر وتشوفي ادائك. نصيحتي هو انك تضحي بشهر بس تحاولي كبداية انك تكتفي بالتسجيل شو عم تصرفي...يعني ما تغيري طريقتك بس مهم تسجلي كل شي كيبر وصغير وهلأ بيجي الشغل...
بآخر الشهر ومع دفترك والآلة الحاسبة وفنجان قهوة...اقعدي واطلعي يا حبيبتي على البلاوي....!!!!!!
جد انا لما بديت بهالقصة من زمان اكتشفت اني بصرف على شراء المجلات والعلكة مثلا كل ما وقفت على الكاش بدفع مبالغ مش بطالة كل شهر...يعني السوبرماركتات عارفين كيف يغرونا... كمان اكتشفت اني بشتري اشياء جاهزة كتير وخلطات ممكن بكل سهولة اعملها بالبيت بس كان عذري دايما ما في وقت وانا مستعجلة ويالله...بس شو ما في وقت؟!!! عذر اقبح من ذنب...في وقت كتير اذا خصصت...يعني لو بعطلة نهاية كل اسبوع خصصت ساعة لعمل خلطات بهارات او مكسات مثل البان كيك او البراونيز...اديش بتوفري فلوس ووقت بعدين...صح؟!!!!

نرجع للمفيد فاذا عملت هادي الخطوة رح تقدري تحددي وين الفلوس بتروح على الاشياء اللي مش مهمة عشان تمحيها من تاريخك الى الابد!!! ومشان ما تحسي انك عم تحرمي حالك من مجلة بتحبيها او اي شي تاني من الاشياء الغير ضرورية..بآخر الشهر اذا كنت شاطرة والتزمت بميزانيتك اعطي حالك جائزة واشتري واحدة منها.

طيب وبعد ما قمت الاشياء اللي مش مهمة ولغيتيها بيصير عندك تصور اوضح انت اديش بيلزمك بالشهر لاغراض البيت وهون بتشوفي اذا المبلغ معقول ممتاز...هادي ميزانيتك...اذا المبلغ عالي...لازم ترجعي وتعيدي حساباتك ووخففي شوي بس من هاد المبلغ عشان ما يصير عندك ردة فعل عكسية للموضوع وتكرهيني وتكرهي الميزانيات...هههههه...والشهر اللي وراه خففي كمان شوي ومع بناء الخزين بتصيري تشوفي الفرق وانك ممكن تخففي اكتر واكتر لتوصلي للمعقول...

اما الخزين وبناءه فنفس صاحبتي اللي سألت برضه سألت سؤال وجيه وهو انه زوجها بعتقد انه الافضل ما نشتري زيادة وبس نشتري وقت ما نحتاج. وجهة نظر!!! بس برأيي انه بناء الخزين بيوفر كتييييير وخاصة على المدى البعيد. بس مش معناته تروحي وتصرفي 1000 دينار بحجة بناء الخزين!!! الفكرة انه تخصصي جزء من ميزانيتك الاصلية الها وتاخدي كل النقاط اللي حكينا عنها بعين الاعتبار من العروض، للي شو لازمك، وشو بتستهلكي اكتر بالبيت...الخ. واذا ما في عروض منيحة خلص حوشي المبلغ للاسبوع اللي وراه يمكن يصير عروض فظيعة وتستفيدي اكتر...وشوي شوي بتلاقي صار عندك مخزون ممتاز اذا ما في ميزانية كبيرة هادا الشهر امورك بتكون مرتاحة وبتقدري تعملي احسن اكل باللي موجود عندك اصلا.

طيب عشان الخص الموضوع هي اللي لازم تعمليه بخطوات مختصرة اذا ما عندك فكرة من وين تبدي بموضوع الميزانية وبناء الخزين:
اولا وقبل 1...اشتري دفتر جديد خاص للميزانية واذا بتحبي الكومبيوتر استعملي برنامج اكسل بس انا بحب الدفتر عشان بقدر آخده اي مكان وبقدر احط فيه الفواتير للشهر...الخ
1. سجلي مصاريفك بدون اي تغيير مدة شهر
2. راجعي المصاريف والغي اي شي مش ضروري واوصلي للمبلغ المعقول للشهر الجاي بدون ما تظلمي حالك وتعاقبي العيلة...الموضوع خطوة خطوة
3. خصصي جزء من الميزانية لبناء الخزين (وممنوع يروح على اي شي تاني غير الخزين واذا ما انصرف بتحوش للاسبوع اللي وراه)
4. هلأ اكتبي قائمة كبيرة بالاكلات اللي عيلتك بيحبوها وهادا بده قعدة رايقة مع كل الوصفات اللي عندك  والوصفات اللي حابة تجربيها لهاد الشهر...الخ ...هاي القائمة رح تصير مرجعك دايما واي اكلة جديدة بتجربيها وبتعجبهم تضاف على القائمة.
5. القعدة التانية هي ببداية او نهاية كل اسبوع عشان تعملي المنيو الاسبوعية . وعشان تصير هاي العملية بكل سلاسة بيكون عندك:
أ. القائمة الكبيرة بالاكلات اللي بتحبها عيلتك مشان ما تحتاري
ب. العروض بالسوبرماركتات مشان تستفيدي منها. مثال....سوبرماركت عامل عرض على اللبن والعيلة بتحب الشاكرية...ممتاز يبقى هي اكلة ليوم السبت...راس الزهرة الكيلو ب 1/4 دينار والعيلة بتحب المقلوبة...هي مقلوبة يوم الاحد...انا حابة اجرب تشيز كيك جديدة وبدها طبعا جبنة ومحطوطة الجبنة على العرض فبجيب لاجرب الوصفة ...الخ ...وصلت الصورة!!!
6. سجلي كل مصاريفك بعد التسوق واحتفظي بالفواتير لنهاية الشهر احتياط اذا حبيتي ترجعيلها وبعدين بتتخلصي منها بس تبدي الشهر الجديد...
7. راجعي صرفك بآخر الشهر وشوفي اذا التزمت او لأ ووين صار خلل ومش نهاية العالم لسة بتقدري تزبطي الامور الشهر اللي وراه....
8. اذا عندك التزامات اجتماعية مثل عزايم ممكن تخصصيلها مبلغ خاص بالبداية بس مع بناء الخزين لادام رح تلاقي انه ممكن تعملي عزايم من ضمن المزانية لانه عندك كتير من الاغراض اصلا.

مع تمنياتي الكم برحلة موفقة...لانها بالفعل رحلة وبالنسبة الي صار نوع من الادمان والتحدي لذاتي...وحلو الواحد بتحدى حاله مرات ويدفش حاله (لاحظوا يدفش!!!!)  ليصير احسن...

اما وصفة اليوم فهي للارز المصري المعمر بدون لحم وجد انه بيعمر المخ...مش قليل السعرات ابدا بس زاكي جدا وجربوه من فترة لفترة لانه اذا انعمل كتير رح تشوفي النتائج على الارداف!!! هههههه
الاصل انه ينعمل بفخارة بس اذا ما عندك ممكن بطنجرة بتدخل الفرن واعذروني المقادير مش كتير واضحة لاني بفترض الاغلب بيعرف يعمل الرز بس هو بده سائل اكتر من الطريقة اللي على الغاز...هادا الرز بكون مفرمش على الوجه ...

الارز المصري المعمر (بدون لحم)
المقادير:
2 كوب رزعادي (مصري او متوسط الحبة) منقوع 20 دقيقة على الاقل ومصفى
سائل لطبخ الارز وفي العادة هو الحليب بس انا خلطت حليب ومرقة دجاج والحليب اكتر من المرقة
1/4- 1/2 كوب كريما سائلة
2 ملعقة طعام سمنة بلدية اة حيوانية او زبدة (ما بدنا مارجرين او زيت ...ما بيطلع معمر وبيعمر الراس!!!!)
زيت نباتي لدهن الفخارة
ملح

الطريقة:
يحمى الفرن الى 180
تدهن الفخارة او الطنجرة بالزيت
يخلط الارز بالملح ويوضع في الفخارة
يسخن السائل الى حد الغليان ويصب فوق الارز (كمية اكبر من الطريقة على الغاز) عادة على الغاز بخلي المي تغمره قد عقدة اصبع...هون بدنا اكتر
توضع الكريما والزبدة او السمنة على الوجة
يدخل الفرن وبدون تغطية ويترك من 35-40 دقيقة ليبدأ الوجة بالاحمرار قليلا
يوضع لدقائق تحت الشواية ويقدم...مممممم وصحتين