مربعات المربى وبسكوت الزنجبيل

عجقة عجقة...وكسل  كسل هو روتين حياتي هاليومين...تناقض صح؟!!! بس من كتر الاشياء اللي براسي ولازم اعملها حاسة حالي تعبانة وانا مش عاملة اشي اصلا!!! بعرف انه يمكن اللي بحكيه مش منطق للبعض منكم بس الي هو قمة المنطق...واعتقد انه السبب الرئيسي هو فنجان القهوة الصباحي اللي اكيد اله دور في انه ينفض كل غبرة الكسل عني ويخليني افززززز واقوم اعملي كم شغلة من قائمة المليون شغلة تحت الانجاز الي براسي!!! يا الله هانت ان شاء الله...كم من يوم وبنرجع لقهوة الصباح بس والله رمضان اله وحشة كبيرة من هلأ!!! وليش هالقد القهوة ماثرة علي وانا لا عندي دوام بدري؟!! لأ في دوام بدري مع الاستاذ هارون اللي الساعة 8 بالكتير بيكون يطالب ويناشد باني اغيرله واطعميه والعب معه...وهيك بيكون طار النوم...طيب نامي بالنهار...ههههههههه ضحكتوني!!! يعني الوقت اللي بياخد فيه الاستاذ غفوة يدوب اطبخ واعمل اشي من قائمة الاشياء اللي لازم اعملها واللي منها اني اكتب على المدونة....يعني هلأ انا عم بكتب وهو بلعب وبيطلع علي بنظرات معاتبة وبينق شوي..بس بدي اخلص البوست تحت اي ثمن!!!!هههههه!!!

قربت المدارس كمان...لسة استلام الكتب ب 12 الشهر واللي معناه رحلة مع التجليد بستمر لبعد ما تبدا المدرسة لانه في الدفاتر واللي بنجلدها على حسب ما بيطلبوا المعلمات والمعلمين...ولسة لازم اعمل جرد لخزانة ادوات المدرسة اللي عندي عشان اجيب النواقص وبس وما اشتري اشي زيادة...واقنعت الاولاد باستخدام شناتي السنة الماضية واللي لسة في حالة ممتازة (ياسمين) وجيدة (سلطان) ..مش معقول الفرق بين الاولاد والبنات في التعامل مع الاشياء...المهم النية اني لازم اعزل خزاين الاولاد قبل المدارس ...احنا عزلنا المكاتب اول ما خلصت المدرسة بس سبحان الله ما بتعرفي من وين بتكوم الكراكيب والاشياء...الله يرضى عليها ياسمين عزلت خزانتها باليومين السابقين وكانت مهمة هادي الخطوة مشان الاواعي اللي بتصغر بقدرة قادر (ما شاء الله ) خلال شهر او اتنين!!! فالباقي حاليا هو خزانة سلطان وهارون كمان...ولازم ترتيب اواعي العيد وكويها للي شوي اتجعلك بحكم انه احنا لما بنطول اشي من الخزانة لازم كتييير اشياء توقع عن العلاقات!!! شايفيين كم علامة تعجب للآن...آه...الله يخليهم ويهديهم...

انتوا شو ترتيباتكم للعيد...مش رح اسأل عن المدرسة لسة بس حبيت اشارككم شوي من الافكار اللي ببالي...
رح تتفاجئوا يمكن...ويمكن لأ اني لغاية الآن مش ناوية اعمل التقليد اللي بعمله كل عيد وهو البسكوت...على الاقل بيكون فيه (ومن غير مبالغة) 9 انواع بسكوت...هادا العيد اظن انه فيوزاتي ضربت ومش ناوية اني اعمل اشي...يعني بينطبق علي مثل "باب النجار مخلع" قاعدة بفتي وبحط وصفات بسكوت بس ما عندي نية لعمل اي نوع هادا العيد...والي اسبابي الخاصة وواحد منها هو حالة الكسل اللي عندي اليوم...

اليوم برضه وصفتين للبسكوت للتعويض...بجد بكون بدي احط الوصفة كل يوم بيطلعلي شغل من تحت الارض....

الوصفة الاولى لمربعات المربى ( حلو قديم بس الكل بحبه وبنصحكم تجربوا الوصفة كتيييير زاكية)

مربعات المربى
المقادير:
2 اصبع زبدة بحرارة الغرفة
كوب+ 2 ملعقة طعام سكر
1/2 2 كوب طحين
4 ملاعق صغيرة بيكنغ باودر
رشة ملح
بيضة مخفوقة
2 ملعقة صغيرة فانيلا
كوب مربى اي نوع تفضلين (انا استعملت خوخ صنع بيتي :) وممكن استخدام حشوة الباي مثل البلوبري او الكرز او الفراولة او التفاح

الطريقة:
ينخل الدقيق والملح والبيكنغ باودر
تخفق الزبدة والسكر لتصبح خفبفة القوام
تضاف البيضة والفانيلا وتخفق جيدا
بضاف الدقيق وتخلط لتصبح عجينة متماسكة (لا تزيدي في العجن)
تدهن صينية وتفرد 2/3 العجينة كطبقة متساوية
تفرد المربى
يوخذ الجزء الباقي ويبشر على الوجه
توضع في الفرن على حرارة 180 لغاية ما يصبح القاع ذهبي ونحمر الوجة قليلا...حوالي 25-30 دقيقة

الوصفة الثانية لبسكوت الزنجبيل الرائع...
بسكوت الزنجبيل
المقادير:
1/4 2 كوب طحين
2 ملعقة صغيرة زنجبيل مطحون
ملعقة صغيرة كربونات
3/4 ملعقة صغيرة قرفة
1/2 ملعقة صغيرة كبش قرنفل
1/4 ملعقة صغيرة ملح
3/4 كوب زبدة بحرارة الغرفة
كوب سكر
بيضة
ملعقة صغيرة فانيلا
ملعقة طعام ماء
1/4 كوب دبس (عنب او تمر)
2 ملعقة طعام سكر للتغطيس

الطريقة:

يحمى الفرن الى 175
تبطن صواني الخبز بورق الخبز
يخلط الطحين مع كل البهارات والكربونات والملح
تخفق الزبدة والسكر لتصبح خفيفة القوام
تضاف البيضة والفانيلا والماء والدبس وتخفق
يضاف الطحين وتحرك لتختلط
نكورها طابات وندحرجها بالسكر ونصفها متباعدة في الصينية
تخبز من 10-12 دقيقة
تترك لدقيقتين على الصينية ثم ترفع لتبرد على سلك معدني والف صحة

•