ساندويشات جيب التاجر

صار مارق اسبوع من رمضان....كلنا كنا قلقانين انه ما رح يكون سهل بس سبحان الله الجو حلو ومعقول واللي بيشغل حاله (حتى ست البيت اللي زيي) بيمرق نهاره بسرعة..الله يكمله علينا كلنا بخير...
وبما انه مرق اسبوع خليني استعرض معكم القائمة اللي كنت حطيتها لوجبات الافطار للاسبوع الماضي عشان اشطب اللي انعمل ونضيف اشياء جديدة ونخلي اللي ما انعمل على القائمة...
اللي انعمل رح اعمله هايلايت

قائمة الاسبوع الماضي...

الاول: شوربة فريكة على عظم خروف من الفريزر، فتوش، فول مدمس، ملوخية وارز، عصير ليمون بالجريب فروت وعصير توتي فروتي بوظة تشيز كيك الفراولة

الثاني: شوربة عدس مع مكعبات الخبز المقلية، سلطة عربية ناعمة، سبرنغ رولز، ورق دوالي، لبن، عصير ليمون بالنعنع وبانش، لفائف التمر باللوز وكريم كراميل

الثالث: شوربة الذرة بالجبنة، سلطة يونانية،  انشلادا الدجاج، اصابع الجبنة المقلية، عصير مانجا وعصير برتقال وهريسة جوز الهند

الرابع: شوربة كويكر، اجنحة الدجاج ترياكي، كولسلو، فتة حمص ،  عصير توتي فروتي وقمر الدين بماء الورد وقشطلية

الخامس: شوربة شعيرية، فتة دجاج، ساندويشات التوست بالدجاج ،  عصير فمتو و فلوريدا ، شباكية (حلو مغربي)

السادس: شوربة قرع (قرع مسلوق من الفريزر)، داوود باشا بالطحينة مع ارز، فول مدمس، فتوش، سمبوسك بف هندي، قطايف عصافيري بالقشطة وبالنيوتيلا

السابع: شوربة بصل بالكريما، معكرونة باللبن، معكرونة ببندورة، سلطة الشيف، سمبوسك بالجبنة الحلوم، مهلبية بالفراولة

مش بطال...لسة فيه اطباق ما انعملت وفيه اشياء عملتها ما حطيتها ومنها: ساندويشات الشاورما

القائمة المقترحة للاسبوع الجاي ان شاء الله هي ابتداءا من اليوم:

الاول: شوربة فريكة على عظم خروف من الفريزر، تشكن تندرز بصوص البافلو (وطريقتها موجودة على المدونة بس اضغطي على الكلمة بتاخدك للوصفة)، بطاطا مقلية، فتوش، قطايف نيوتيلا وكريم كراميل عصير ليمون بالنعنع، وعصير مانجا

الثاني: شوربة كويكر، فتة حمص، دجاج الا سلطان (بالثوم والكزبرة)، ارز، عصير فمتو، عصير اناناس وليمون، شباكية

الثالث: شوربة شعيرية، فتة دجاج،  سمبوسك بف هندي، عصير بينا كولادا وعصير برتقال ومهلبية الفراولة

الرابع: شوربة قرع، عرايس لحمة، سلطة البطاطا بالشبت، سلطة خيار بلبن ، عصير توتي فروتي، عصير ليمون وكيوي، حلو بافي (ان شاء الله بشارككم الوصفة

الخامس: شوربة بصل بالكريما، معكرونة بالبشاميل، سمبوسك بجبنة حلوم ، سلطة جرجير بالفليفلة المشوية كعكة بوظة الاوريو (برضه رح اشارككم الوصفة)

السادس: شوربة بروكلي بالجبنة، داوود باشا بالطحينة مع ارز، سلطة جرجير بالباذنجان والرمان (ممكن تشاهدوني على رؤيا بالضغط على اسم السلطة)، كريب بالنيوتيلا، عصير بطيخ وليمون وعصير برتقال ، قشطلية

السابع: شوربة الجرجير (آه زي ما سمعتوا وان شاء الله بشارككم وصفتها كتير زاكية)، انشلادا الدجاج، سلطة الدجاج الصينية،عصير ليمون ونعنع وعصير توتي فروتي وموس الشوكولاتة والكراميل

طيب بالنسبة لاكلة اليوم فهي ساندويشات سهاة كتيييييير...اسمها جيب التاجر وهي بتنعمل بالتوست وبتنحشى اي شي بدك اياه...اهم شي فيها هو التخطيط المسبق عشان ترتاحي بس انا ما بحس انها بتعب...ورح امشي معكم خطوة بخطوة فيها...

ساندويشات جيب التاجر

المقادير:

رغيف خبز توست نوع جيد (مهم لانه اذا نوعه بفتفت رح تحقدوا علي)

بيض مخفوق (حوالي 3)

ملح وفلفل اسود

بقسماط 

زيت غزير للقلي

الحشوة:

4 صدور دجاج صغيرة مفرومة ناعم

حبة فليفلة خضراء مفرومة ناعم

بصلة صغيرة مفرومة ناعم

2 ملعقة زيت زيتون

2 ملعقة كبيرة جبنة كاسات

2 ملعقة كبيرة كريما او قشطة

(في وصفات بيحطوا مايونيز انا ما بحب)

ملح وفلفل اسود

خس مفروم

الطريقة:

(ممكن تعملي الخبز بكميات وتحتفظي فيه بالفريزر وبينه ورق نايلون او خبز عشان ما يلزق ووقت بدك تعملي بتطلعيه وهيك بيختصر وقت كتير)

توضع قطعتان من الخبز التوست فوق بعض وتفردان بالنشابة (مرقاق العجين) لتصبحان كانهما شي مبسط واحد. بكاس كبير او صحن شوربة نضغط على الخبز ليصبح دائرة (الحواف الزائدة تستخدم لعمل البقسماط)

واستمري حتى تنتهي من الكمية وغطي الخبز اثناء العمل كي لا ينشف

غطسي كل دائرة بالبيض المخفوق مع الملح والفلفل ثم في البقسماط (لح هذه الخطو يمكن ان تضعيها في الفريزر لوقت الحاجو وشكلها كالتالي

ويقلي بزيت غزير ايصير ذهبي ورح ينفخ مثل هيك 

للحشوة: يوضع زيت الزيتون في مقلاة ويضاف الدجاج ويقلب لينضج ثم يملح ويبهر ويضاف البصل ويقليب ليذبل ثم الفليفلة وتملح وتبهر...ترفع عن النار وتضاف الجبنة والكريما وتكون جاهزة لحشيها داخل الساندويشة

طريقة الساندويشة:

تقطع الدائرة من النصف وستكون من الخبز العربي او الجيب يحشى بالدجاج والخس...وممكن ما تقطعيه بس تعملي جيبة...

وهيك كان شكله...

وطاااااااااااااااااااااااروا...صحتين على قلب كل اللي اكل...وصيام مقبول ان شاء الله