الكورن تشاودر الملون والطبق التقليدي من الطفولة معكرونة باللبن

وعدتكم اني احط وصفة كل يوم برمضان بس امبارح ما قدرت لانه هارون كان تعبان ..فاعتذاري منكم جميعا!!! ولانه اليوم انا كتير مشغولة وعم بستغل الفرصة انه نايم..فاسمحولي رح يكون المقال مختصر(نسبيا!!) وكمان رح اكتب مقال تاني اليلة تعويضا عن مقال امبارح...كييف انا معكم!!! :)

المهم...كان في سؤال على الفيس بوك من صديقة عن تقالة بتنحط على الورق دوالي والكوسا اثناء الطبخ...وكتير ناس جاوبو عليه بافكار متعددة وطلع فيه تقالة بتنباع!!! انا اول مرة بعرف!!! في ناس بيحطوا صحن على قد الطنجرة بالضبط وناس ابريق شاي مليان مي عشان الوزن وناس زيي بيحطوه قطعة رخامة او حجر زلط مسطح نظيف فوق صحن...مثل الصورة

طيب نرجع لوجبة الافطار ورمضان...اول امبارح كانت النية اني اعمل شورة الرز باللحم بس...ولكن قررت اني اعمل شوربة تانية هي الكورن تشاودر الملون (شوربة ذرة مع بطاطا وخضار اخرى) لذيذة كتير ومشبعة...ووصفتها تحت...اما عن
  مهمتي امبارح فكانت: بواقي الشوربة، فتوش، بواقي ورق دوالي (صحن صغير) وعصير توتي فروتي وعصير فلوريدا (الوصفة رح تكون بمقال الليلة ان شاء الله ومعكرونة باللبن (انا شخصيا بحبها كتير) واذا لاحظتوا فانا عم بستخدم اكلات من المنيو المقترحة اللي حطيتها واللي رح اراجعها معكم بس يخلص الاسبوع عشان نشطب اللي نعمل ونضيف اي نواقص وهيك بنكون جاهزين ومفكرين... وبالنسبة للمعكرونة باللبن فالناس بيعملوها بطرق مختلفة...بالنسبة الي انا بعتبر انه كل شعب عندة طبق بارد بالمعكرونة زي سلطة المعكرونة واحنا عنا المعكرونة باللبن...في بيت اهلي تربيت على هالطبق اللذيذ واللي كان ما يضل منه اشي اذا انعمل وهو عبارة عن معكرونة مسلوقة (اي نوع بتحبيه...انا استعملت اساجيتي بس عند اهلي كنا نعملها بالمعكرونة الانابيب الطويلة اللي كنا نكسرها...جد ايام حلوة!!!) ولبن مسنون بالثوم والملح ولحمة مفرومة خشن مقلبة مع بصلة وبهارات مشكلة وقرفة...وتزين بالقلوبات اذا حبيتي تكلفيها وبقدونس مفروم...

اليوم مهمتي....صفر!!! احنا معزومين وبالتالي ما في طبخ...
اما وصفة الكورن تشاودر الملون فهي:

الكورن تشاودر الملون
المقادير:
2 ملعقة طعام زبدة
بصلة متوسطة مفرومة ناعم
حبة فليفلة خضراء وحبة حمراء وسط مفرومين ناعم الى وسط
2 حبة جزر مفرومة ناعم
علبة ذرة مصفاة
1/2 1 كوب بطاطا مكعبات (وممكن مهروسة وهي طريقة جيدة للاستفادة من بواقي هريس البطاطا)
ملح، فلفل اسود
3 كوب ماء (ممكن نحتاج اكثر اذا كانت جامدة
2 كوب حليب
كوب كريما
3/4 كوب جبنة شدر مبشورة

الطريقة:
تسيح الزبدة في قدر كبير وتقلب البصلة لتذبل
تضاف الخضار الاخرى وتملح وترش بالفلفل وتقلب من 3-5 دقائق على نار متوسطة
يضاف الماء (وممكن استعمال نكهب مرق دجاج او مرق دجاج بدلا من الماء) وتترك على نار هادئة لتنضج الخضار (بين 12- 15 دقيقه)
يضاف الحليب والكريما والجبنة وتحرك اتختلط المكونات وتذوب الجبنة ونحرص على ان لا تغلي لكي لا تفصل (تفتل او تفرول بالعامية) تقدم مع رشة اوراق بقدونس على الوجة...وصيام مقبول ان شاء الله